صعب إنك تبقي بنت... صعب أوي كمان
كل تفصيلة في حياتك مُرهقة
وعشان تبقي عادية، ده عاوز مجهود خارق
فما بالك بقى بإنك تبقي جميلة
كل حاجه مؤلمة ومرهقة،
وأنا هنا مش بـ تكلم عن الـلي هـ يجي في بالك، لأ
أنا أقصد مثلًا لو إني طهقانة،
وطلعان عينك في السواقة، والشغل، والناس، وقرفهم،
والوحدة الـلي بـ تخليني زي ورقة الشجر الهشة
لو نسمة هوا عدت، أبقى عاوزة أعيط

"ما ينفعش تبقي متنكدة، ونكدية، وقالبة وشك!
إنت إيه؟ ما بـ تشوفيش بنات؟
مين هـ يطيق يبص في وشك وهو بالمنظر ده؟
يا بنتي اتعلمي: مهما كنتي متضايقة، ده ما يبانش عليكي،
ولا أي حد يحس بيه
عشان أما تتجوزي، جوزك ما يزهقش منك"

ما إنشالله عنه ما بص لي ولا طاقني!
هو أنا يعني عشان أتجوز
وعشان جوزي يحبني
أمووووت في داهية من زعلي ومن غيظي ومن وحدتي؟

أنا أطالب بإلغاء كلمة "عقبالك" من عقول الناس
أنا بـ كره الكلمة دي وعمري ما فهمتها
ولا لاقيت رد مناسب ليها
كلمة مستفزة بجد
وأما تقولي: "أنا عاوزة أجيب كذا (أي حاجة يعني)"
يقولوا لك: "آه هاتيها، وشيليها في جهازك"
طب سؤال، إفرض ما اتجوزتش خالص
أقعد بقى كل أما عيني تقع على حاجة من الحاجات دي وأنا لوحدي
أكتئب أكتر وأكره نفسي أكتر، وأكره وحدتي أكتر وأكتر
أنا: "بابا، أنا عاوزة أروح (أي مكان) مع أصحابي"
بابا: "لا، أنا معنديش بنات تروح (أي مكان) لوحدها أو مع أصحابها
الأماكن دي تروحيها مع جوزك"

حراااااااااااااااام عليكو بجد تحصروا حياتي واهتماماتي وكل حاجة بـحبها في جوازي

صعب أوي إنك يبقى مطلوب منك تبقي مليانة أنوثة،
في نفس الوقت مستقلة ومعتمدة على نفسك،
بـ تشتغلي عشان محدش هـ يصرف عليكي،
انتِ كبرتي واتعلمتي أحسن تعليم
ومش هـ تقعدي في البيت مستنية العَدَل
لأ، انزلي دوري على العَدَل في الشغل

والناس الكبار المستفزين إللي يسألوكي:
"إيه؟ مفيش أي حاجة كده في الشغل؟"
ولازم تتعلمي السواقة لأن محدش فاضي لك يوديكي ويجيبك
طب والنبي حد يقول لي منين وإزاي
أبقى الأنثى الرايقة الفرفوشة الـلي بـ تشع طاقة
وهي أصلًا بلا طاقة؟
كفاية كده دلوقتي ونكمل بعدين