كنت هناك لما بدأت التعليقات في الشارع تتحول من "يا عسل" لـ "عايز أدخله"!
كنت هناك لما سكتوا كل الناس ومحدش اتكلم،
فافتكرت إن أنا لوحدي اللي بـ يحصل لي كده ... فكرهت جسمي وانوثتي وحياتي ...
كنت هناك لما واحدة صاحبتي حكت لي، وواحدة صاحبتي تاني برضه حكيت لي …
وهكذا لحد ما اكتشفت إني مش لوحدي ...
لحد ما اكتشفت إن مفيش بنت أعرفها ما اتعرتضتش للتحرش
كنت هناك وقت ما كان لسه التحرش ما اسموش تحرش ...
ما كانش له اسم ...
وانا ما كنتش بدور له علي اسم ...
كنت بس بـ دور علي طريقة أطرده بيها من مخي وذاكرتي
كنت هناك كل يوم بـ تفرج علي غيري بـ يتعرضوا لحوادث غيرت حياتهم للأبد …
وبعدها ولا هي نفس الضحكة ولا هي نفس الابتسامة
