أزمة هوية

أزمة هوية

لسه فاكرة ...
لسه فاكرة كل الـلي كنت بـ سمعه وانا صغيرة
أول ما كبرت أنا واصحابي وابتدينا نخرج لوحدنا
"خلي بالك وانتِ بـ تعدي الشارع"
و"إوعي حد يديك وردة تشميها"
و"لو لاقيتي شارع ضلمة ما تمشيش فيه"

لكن الـلي مش قادرة أنساه هو ده
"مش عايزين مشية بنات! أمشي زي الراجل!"
"خليكي زي الشاويش وانتِ في الشارع!"
"البسي أوسع حاجة عندك وانتِ رايحة المكان الفلاني
البسي حاجة ما تبيّنش أي حاجة وانتِ رايحة المكان العلاني
البسي حاجة ما تبيّنش إنك بنت!"
ليه أمشي زى الولاد؟
هو عيب إني أكون بنت؟
ليه أمشي زي الشاويش؟
مش أنا بنت؟
من الطبيعي جدًا إني أمشي زي البنت
ماهو أنا بنت
ليه عيب وما يصحش واختشي يا بنت؟
ليه أمشي أحط عيني في الأرض وما ابصش لأي حد؟
ليه أداري إني بنت؟
لأ ازاي؟ لازم طبعا أسمع الكلام!
سمعت الكلام
سمعت الكلام كله

وكنت بـ حس بالذنب كل مرة حد يحاول يعاكسني
أو يقول لي كلمة عن شكلي
"إيه يا بت نسيتي نفسك وعيشتى كبنت ولا إيه؟! لا استرجلي كده!"
يفرحوا بيكي أوي أول ما تسرحي شعرك وتحطي روج فى البيت.
ويجيبوا لك حاجات البنات وآخر دلع
لكن أول ما تخرجي لوحدك لأ!
ويستغربوا أوي إزاي مش بـ تهتمي بنفسك وانتِ عندك خروجة حلوة!
عايزينك بنت فى وقت وراجل في وقت،
سمعت الكلام
مشيت زي الراجل ولبست زي الراجل وعشت زي الراجل
ودلوقتي خايفة أبص في المرايا

أول ما صدري ابتدا يكبر كنت على طول بـ حاول أداريه
ألبس هدوم واسعة وbra ما يبيّنش أي حاجة خالص
وبعدين بقيت بـ حط كوفية
وفي الصيف بـ قلق أوي من غيرها فابتديت أحط إيشارب
بقيت مجرد فكرة إن يبان إني عادي زي أي بنت عندي صدر بـ تقلقني
ولما ابتديت أكبر والبس زي بقية مخاليق ربنا
كنت كتير بـ خاف وافضل أبص على صدري وانا ماشية ... هو باين؟
ولسه لغاية دلوقتي ساعات كتير أجري على البيت علشان أقلع الإيشارب واتأكد إني لسه بنت.

x
تنويه القصص الموجودة على هذا الموقع قد تسبب للبعض شعور بعدم الارتياح أو الألم. في حالة شعورك بذلك، تذكر أن تتنفس، وأن تأخذ بعض الوقت مع ذاتك قبل مواصلة القراءة، أو بالتوقف عن القراءة إذا استدعى الأمر