من وانا عندي 12 سنة، قررت أتحجب
وبعدين وعمري 17 سنة، قررت ما أختلطش بالرجالة خالص، ولا أتكلم معاهم
في ناس قالوا لي: "أنتِ بقيتي متزمتة"
وناس قالوا لي: "بارك الله فيكي"
وفي أصحاب كتير بطلوا يـ تكلموا معايا خالص،
لكن محدش قال لي أعمل إيه مع خطيبي؟
بالنسبة لي هو راجل، يعني مش ممكن أسلم عليه
لكن في نفس الوقت، هو هـ يبقى جوزي بعد شهرين.
أنا خايفة أوي، ومش عارفة أعمل إيه
مكسوفة أسأل أصحابي أو أمي
كان نفسي أمي تكلمني، وتقول لي أعمل إيه، أو أفكر في إيه
بس هى ما كـلـمـتـنـيـش خالص
ولما اتقطعت بيا السبل، فكرت إني أعتمد على نفسي، واتصرف لوحدي
روحت دخلت على الإنترنت.
طبعًا كان في حاجات مقرفة كتير
مواقع فيها صور وجعت معدتي
وإحساسي بالخوف زاد
هو أنا ممكن أعمل كده زي الـلـي في الصور ده؟
هو جوزي، وانا مراته
لازم أسعده، وهو لازم يسعدني بكل طريقة هو عايزها أو أنا عايزاها
ربنا قال كده، هو حلالي وانا حلاله.
ليه يا ماما ما كـلـمـتـيـنـيـش؟
ليه مفيش حد أسأله؟ ده حلال ربنا
وأخيرًا، لاقيت موقع علشان النصايح، من غير صور -الحمد لله-
وقرأت كتير أوي، بس برضه ما فـهـمـتـش حاجة.