كنا مع بعض اليوم اللي قبله
اتقابلنا عشان نتصالح، عشان قبلها كنا متخانقين خناقة كبيرة
اتكلمنا في كل حاجة وحضنا بعض
وفاكرة كويس أوي وهو بيوصلني البيت بعد ما وقف العربية،
فضل مبتسم لي أكتر من أي كل مرة، وكنت كل ما أتدور ألاقيه مبتسم لي
كنت مبسوطة أوي، وواثقة إنه بالليل هيبعت لي يقولي قد إيه هو مسبوط
ما بعتش ... استغربت.
لما بعت الصبح قلت أكيد هي دي اللي أنا مستنياها من إمبارح بالليل
لكن لاقيته بيقولي "أنا مش قادر أكمل ... أنا آسف"
بصيت في المسج ، قريها وحطيتها علي جنب ونمت تاني.
صحيت بعدها ب ١٠ دقايق أبص فيها تاني.
كل ١٠ دقايق أبص فيها تاني كأنها هـ تتغير، كأنها مش موجودة!
رُكبي وإيدي كانوا سايبين،
وكنت حاسة إن روحي بتتسحب مني، وفيه حاجة في صدري بـ تـقفش،
ومش عارفة آخد نفسي ولا آكل
كأني لو اتنفست، وأكلت، الوقت هـ يعدي والموضوع ده هـ يبقي حقيقة
فـجسمي اتجمد عشان ما يصدقش إن ده حصل
إن قلبي إتكسر

رحت للدكتورة وقلت لها إني حاسة إن في خرم جوايا
اديني أي حاجة... أنا مش مبسوطة كده.
حاسة كأن حد دخل إيده جوايا وأخد حاجة ومشي
فيه فراغ جوا بيوجع... بحس بيه كل مرة بحاول أبلع أي حاجة... زوري بيوجع أوي
أنا عارفة إن بكره أحسن، وإن عادي ده بيحصل، وإن معلش وكل الكلام ده!
بس ده مش بيغير من حقيقة إني مش قادرة، ولا عايزة أقوم من السرير
عايزة الحياة كلها تقف... عايزة مخي يقف
في حاجة جوا بتوجع أوي...
ما تقوليليش عادي وبتحصل
إديني أي حاجة تخلي الوجع يروح