أول مرة اتضربت فيها كنت بـلعب في الشارع
واحدة من البنات الـلـي كنت بـلعب معاهم ضربتني
روحت عند بيتها، وقعدت أحدف على البيت طوب، ما فـتـحِـتـش
روحت طالعة البيت، أمها فتحت لي الباب، روحت داخلة عليها ضارباها
أمها قالت لي: "يا اختي، أنتِ جريئة أوي"
كنت بحب آخد حقي بإيدى، بس لما كبرت أبويا وأمى وقفوا فيا الحكاية دي
كسروها جوايا
"ما ترديش، ما تعمليش، اسكتي".
أول مرة ضربت حد بعدها كان ابني
ضربته عشان راح لسته من غير ما أعرف، وأنا قعدت أدور عليه
والواد استخبى منى ونام، بس أنا ما سـبـتـوش برضه، واديتله بالخرطوم
وأبوه يقول لي: "خلاص"
سيبته، وقولت له: "هـ ضربك تاني لما أبوك يمشي"
كنت بـ ضربه ضرب غباء، كان ممكن يموت في إيديا وما آخدش بالي
كان بــ يعيط ويصرخ وأنا واخداه جوا عشان محدش يحوش عنه.
أنتِ بـ تضربي بس من جواكي ضعيفة
لأنه مهما كان طفل، مهما قاوم مش هـ يقاوم زي الكبير
بس الواد بقى حساس أوي، لو عملتيله إيه، لو زعقت له يقعد يعيط
في الإمتحان كان يغش عشان ما يـتـضربـش مني
بعدها قولت مش هـ ضربه خالص
بـ حاول أمسك نفسي بقدر الإمكان عشان ما أضربوش
أنا ما بحبش الضرب ولا العنف، وعاوزة أعلم ولادي التسامح.