أنا متجوزة بقالى ٥ سنين … ولسه عذراء
أنا بقالى خمس سنين متجوزة دلوقتى، وبجد فى منتهى السعادة
ما كـنـتـش أتمنى زوج أحسن من كده ولا حياة أحلى من كده.
جوزى بيموت فيا ولسه لحد دلوقتى ما بنمرش بلحظات ملل.
بيدلعنى وبيحبنى ورومانسى أوى معايا.
وفوق كل ده وده أنا لسه عذراء
حاجة ما تتصدقش صح؟
إن يبقى فيه راجل قد كده معطاء
إنك يبقى معاكى راجل يحبك، ويبوسك، ويحضنك، ويدلعك، من غير ما ياخد منك حاجة.
فى الأول لما قال لى إنه ما بيعرفش أنا بصراحة استريحت
كنت حاملة هم الموضوع ده أوى،
بس خفت علشان كنت عايزة أبقى أم.
وبعدين دلوقتى فهمت بجد يعنى إيه حب من غير مقابل، من غير تمن.
هو بيحبنى بجد، وبـ يحافظ عليا زى زهرته
وما أعـتـقـدش إن ممكن أى واحدة تقول كده على جوزها.
اتحرمت من الخلفة؟
طب وإيه يعنى؟ هم المخلفين ومتنيليين حواليا دول مبسوطين أوى؟ إجوازاتهم خلاص بـ يعاملوهم زى المكن.
إنما أنا... أنا حاجة تانية!
*القصة اتعرضت في:
- بصي 2010 - القاهرة
خمس سنين
2010