اتحجبت وانا عندي 17 سنة...
ما سمعتش واحد من شرايط عمرو خالد
وانفعلت وحلفت "والله ما أنا نازلة تاني من غير إيشارب!"
وما كنتش وسط واحدة من المجموعات الـلي بـ يطلقوا على نفسهم "صحبة صالحة"
ولا كانت أمي ست الحاجَّة الـلي بـ تدعي لي بـ "الهداية" و"الصلاح" وارتداء "الزي الشرعي"
ولا كنت عكس ذلك!

أنا من عائلة لم تشهد حجاب أي عضو نسائي فيها.
وبالرغم من إنهم بـ يصلُّوا ويعرفوا ربنا
إلا إن الحجاب ده كان بالنسبة لهم "بدعة" و"موضة"
و"بتاع الشغالات والناس العواجيز بس"

وبدون الخوض في أسباب ودوافع قراري
اتحجبت بعد سنة كاملة من التفكير والنقاش مع ولية أمري
وأظن بعد المقدمة دي مش محتاجة أشرح رد فعل أهلي
أمي بصت لي لأول مرة بالحجاب وقالت جملة واحدة حاسمة:
"مش هـ كلمك غير لما تقلعيه"، وقد كان
باقي أفراد العائلة ولا شجعوا ولا عارضوا الفكرة
مرات عمي بس سألت: "هو ده الموضة دلوقتى؟"
وحاول عدد لا بأس به اقناعي بـقلعه علشان أرضي أمي.

أغلب أصدقائي استقبلوا قراري بنظرات تشجيع،
وبعدها تساؤلات عن حياتي بالحجاب:
"هـ تنزلي البـيـســيـن إزاي؟"
و"هـ تعملي إيه في فرحك؟"
و"هـ تشتغلي إزاي؟" ... وخلافه.
وابتديت بالتدريج ألاحظ تجنب الولاد ليا ومعاملتهم بتحفظ ملحوظ!

وبنت خالتي؛ أقرب صديقة ليا، كانت مسافرة
وما فهمتش أنا عملت إيه أساسًا
وكانت كل يوم والتاني تكلمني تقول لي:
"هو انتِ لسه محجبة؟"
ولما رجعِت فوجئت بيها جايبة لي لبس قصير ونص كم
وما زالت تطلق عليا وعلى "الناس الـلي زيى" لقب "معيز"، يعني قطيع
وأنا توقفت عن محاولة الدفاع عن نفسي وعن "الناس الـلي زيى" لما لاقيت إننا ما نستاهلش
نظرًا لأن أغلبنا سفـّه الحجاب واختزله لمجرد غطاء رأس

طبعًا اختياري لكلية إعلام ما كانش ألطف حاجة بعد حجابي
لأن حتى لو دلوقتي أغلب خريجي كلية إعلام جامعة القاهرة محجبات، فده تطور
وقتها كان لسه الحجاب طالع جديد لانج
ومحدش كان فاهم يعني إيه واحدة محجبة تدخل إعلام
دخلت جامعة خاصة
وكنت مدركة إن القرار ده كان نتيجة لخوف أمي من انضمامي للإخوان المسلمين
أو جماعة التكفير والهجرة في جامعة القاهرة
أو إني أجيب لها واحد بدقن طويلة وجلابية واقول لها "بحبه يا ماما"

وبعيدًا عن الأهل، الحقيقة المجتمع المصري تكفل بيا
صنفني وحكم عليا، وأملا عليا شروطه
ما تلبسيش، وما تعمليش، وما تروحيش، وما تشتغليش
ولو عملتي أي حاجة من الممنوعات دول
تبقي محجبة نص نص، وأحسن لك بقى تقلعيه
قصر الكلام إنه بالرغم من الدعوات المتواصلة لبنات مصر إنهم يتحجبوا
فـحتى لما اتحجبنا الناس ما سابوناش في حالنا
طيب من غير حجاب مش عاجب، وبحجاب مش عاجب