الجواز بالنسبة لي كان فكرة سيئة جدًا
مش الجواز نفسه، أنا عارف إني شخص مناسب للجواز
قصدي الجواز لمجرد إننا محتاجين نتجوز
أي شيء بـ نعمله لأننا محتاجين نعمله مش اختيار أصلًا بالنسبة لي
مش بـ عرف أبذل مجهود في أي شيء ما اختارتهوش
عشان كده طبعًا لما اتجوزت ده كان اختياري
كان في إيدي إني ما أعملش ده
لكن عمري ما كنت هـ سيب مايسة تتجوز شخص تاني وهي حامل في ابني!
هي طبعًا ما كانش هـ يكون عندها مشكلة تعمل ده
ما كانتش ناوية تعمل عملية إجهاض، ولا كان ينفع تكون أم من غير جواز
كان مستحيل إني أسيب راجل تاني ينسب ابني لنفسه
فآه، أنا اللي اخترت ده فعلًا في النهاية
أنا مش ندمان على حاجة،

الفكرة بس إني ما كانش عندي أي تصور أنا بـ ورط نفسي في إيه،
كل الكدب والكتمان والتلاعب اللي كنت بـ لاقيه من ستات عيلتها من ناحية،
وإصرار الرجالة على إنهم ينكروا ده تمامًا من ناحية تانية

عملت حاجات كتير من ساعة ما اتجوزت عمري ما كنت أتخيل أبدًا إنها تصدر مني.
الماضي بتاعي مش نضيف برضه تمامًا،
ماكملتش تعليمي،
وبدأت أشرب مخدرات من وانا تسع سنين،
وأدمنتها من وانا عندي 14 سنة،
بس عـالأقل كنت صادق وصريح في كل ده
عالأقل لعيلتي،
ولو الحقيقة ما عجبتهمش فدي مشكلتهم همّ
عمري ما أنكرت أو كدبت في أي حاجة متعلقة بحياتي قبل ما أتجوز
في النهاية دي حياتي أنا، مش حياة حد تاني
بس لأن حياتي كانت بـ تتقابل مع حياة أهلي في حاجات كتير،
كان لازم يعرفوا عالأقل حاجات أساسية عني،
إيه اللي ممكن أعمله، وإيه اللي مستحيل أعمله، زي:
آه، أنا بـ شرب حشيش
لأ، مش هـ كمل دراستي
آه، بـ تاجر في المخدرات من حين لآخر
دي شوية حقايق بسيطة عني شايف إن من حقهم يعرفوها

لكني اضطريت أخبي على باقي الناس إني هـ كون أب
واضطريت أكدب

طبعًا عيلتي كانت عارفة، قلت لهم كل حاجة
وحماتي عرفت، وأختها عرفت، بس خبينا وكدبنا على باقي الناس
إحنا عايشين في الشرق الأوسط
أنا متفهم فكرة إننا ما ينفعش نقول للعالم كله إننا اتجوزنا عشان هي حملت،
بس ليه لازم نخبي ده على كل الناس حرفيًا؟
أقصد ليه نخبي على عيلتها نفسهم؟
ليه ما ينفعش نحترمهم كفاية بإننا نعرف الناس إن بقى فيه بيننا صلة دم؟
الظاهر إن في ناس جبنا أكتر من اللازم

مايسة أكتر حد متلاعب شفته في حياتي
عرفت إزاي تخليني أخبي جزء مهم جدًا من حياتي سنتين بحالهم
رغم إني كنت طول الوقت شخص صريح تمامًا، عمري ما كدبت طول حياتي
عرفت إزاي تخليني أفضل معاها، وأنام معاها، وفوق كل ده أتجوزها

بس لازم أعترف، كانت الصخرة اللي اتسندت عليها لما ماما ماتت
كانت جنبي وبتاعتي بشكل عمري ما كنت أتخيله من أي حد
هي اللي جهزت ماما للدفن
وهي اللي اتأكدت إن شعرها متسرح كويس، كانت عارفة إن دي حاجة مهمة عندها
ماما كانت زي شمشون كده، شعرها هو سر قوتها
ولحد ما ماتت، محدش جاله فرصة إنه يهتم ويعتني بيه غير ناس قليلين جدًا
أنا، وماما، وأحيانًا ماما بس،
وطبعًا سمحت لسامية تظبطه لها الكام مرة اللي قابلتها فيها
سامية وماما كانوا شبه بعض في حاجات كتير،
ما كانش ينفع ما يلاحظوش ده في بعض
شبه بعض في نقائهم
ودلوقتي خسرتهم هـم الاتنين، واحدة ماتت، والتانية رميتها
إزاي ما شفتش قد إيه حد زي سامية كان نادر ونقي؟
برضه مش ندمان على حاجة، عـالأقل لسه محتفظ بكرامتي

بـ يتهيألي مايسة كان لازم تتحول لشخص متلاعب كده عشان تحس إن لها تأثير على اللي حواليها،
خصوصًا إن ما كانش عندها أي قوة لوحدها
كانت وسيلتها الوحيدة إنها تسيطر على العالم بتاعها،
إنها تستغل قوة اللي حواليها،
وكان لازم طبعًا تكون ممثلة محترفة عشان تخلي أي حد عنده أي ميزة أو قوة يقبل بيها في حياته
الحمد لله إن نعمة الشوف موجودة عند كل الناس،
عشان كده ما قدرتش تسرق حياة حد فينا،
أو عـالأقل تعمل ده لفترة طويلة
أو ع الأقل لحد دلوقتي، أصلها لسه بتحاول تطور مهاراتها
ربنا يحمينا كلنا لو قابل شخص عنده أي قوة بس مش بـ يشوف
مين عارف

إزاي أنا شخصيًا ما قدرش أشوف مايسة على حقيقتها طول الوقت ده؟
كنت عارف عنها كل حاجة، كان معايا كتالوجها، إزاي ما شفتش؟
كانت عاملة زي أي شخص عنده هيبة بين الناس،
لكنه في الحقيقة ما عندوش أي قوة حقيقية
عندها الأدوات اللازمة لاستغلال القوة دي، لكن القوة نفسها مش موجودة

وبـ فتكر إني حاولت أديها الأدوات والمعرفة اللي عندي!