بصوا لي، شايـفيـنِّـي؟ شايـفيـنِّـي كويس؟
طبعًا شايـفيـنِّـي بنت الناس الكويسيين
القميص بكم، والياقة مقفولة، والبنطلون مغطي وواسع
والجزمة سنكرز عملية، شعري ملموم، وشي مغسول
محتشمة بس مش محجبة، صوتي واطي، ووشي هادي
بس ما يغركمش الهدوء ده، أنا من جوايا بـ غلي
محدش فيكم حاسس، ولا هـ تحسوا بالنار الـلـي جوايا
بالغضب، والقرف الـلـي حاسة بيهم.
أنا الـلـي بـ تلام كل يوم من أهلي إني ما اتجوزتش لغاية دلوقتي
كأن ده ذنبي إني عديت التلاتين
أنا الـلـي تعبت في كل حاجة كنت عايزاها، ولما بـ آخدها بـ تلام عليها
لو اشتغلت عشان أنجح، لو حوشت عشان أجيب عربية
لو سافرت عشان أتعلم، وافتح افقي، أو اتفسح
بـ يتقال لي إني أنانية، لأني بفكر في نفسي وبس.
أنا الـلـي تخليت عن حب حياتي، لأنه مش من نفس ديانتي
وانا الـلـي سابني خطيبي الأولاني، لأني طبقًا لمعاييره "ست متحررة"
آه ليا رأي، وليا معارف وأصدقاء رجالة، أبقى أكيد مش متربية كويس
وانا برضه الـلـي سابني الراجل الـلـي حبيته وانا مسافرة
لأني مش بـ شرب، ومش بـ نام، ومقفلة.
أنا الـلـي من الـلـي رقصوا على السلم
لا أنا ملتزمة ومبسوطة
ولا أنا متحررة ومبسوطة
سجن، سجن كبير، عايشة فيه، وحدوده نفسي.
في البراح، مش عارفة آخد نفسي
ولو اتنفست، بـ تخنق
بصوا لي تاني كده
شوفتوني؟