عمر ما كان عندي مشكلة مع رجلي الحديد
المشكلة كانت عند الناس، في عيونهم، وكلامهم
ومصمصة شفايفهم وهم بـ يشوفوني بـ تعكز على عصايتي
أقدم خطوة، وأبطأ في التانية، وانا بـ جرها معايا.

كل يوم بـ تعرض لـ كلام سخيف جدا، وأشهرها الجملة الجميلة بتاعة محمد سعد: "يا واد يا بت"
تقريباً بسمعها كل يوم.
الأول كنت بـ رد وممكن أقف واتـخـانـق…
لحد ما فـى مرة رديـت على شاب اتَّـريـق على شعرى فـ شتمنى واتخانقنا مع بعض.

في ابتدائي كان نفسى أنزل تدريب كاراتيه وسباحة،
لكن ماما رفضت؛ لأني بنت، وعيب أروح.
وعَرَضِت الموضوع على أخويا، مع إنه ما كانش عنده أي شغف تجاه الكاراتيه ولا السباحة،
بس هو ولد بقى، وعادي يروح. وفعلًا ما كملش شهر، وبطل يروح.

في حياة كل واحدة مننا طنط نعمات
ونفس الجمل بـ تتقال في مناسبات مختلفة
"يا بنتي بقى، ما تشدي حيلك"
"هي الرجالة اتعمت؟"
"إن شاء الله السنة اللي جاية تبقي في بيتك".

كان عنده حاجة اسمها شك، كان أما ييجي يخرج يعلق لي شعراية ويقفل عليا الباب
ولما ييجي يشوف لو أنا خرجت
كان الشك صعب أوي بالنسبة له
ربنا كرمنى وكان هـ يرزقنى بخلفة جه قالي: يا انا يا هو
رحت المهم إيه نزلت العيل

من سنتين اكتشفت بالصدفة البحتة إن عندي أورام في الرحم …
الدكتور قال لي:
"الأورام مكانها خطر والعملية ممكن تخلينا نضطر لاستئصال الرحم"
خفت جدا لأن وجود الرحم بالنسبة لي أكبر من إنه يكون له علاقة بس بالجواز، هو مرتبط عندي بإحساس بالأنوثة إحساس بالأمومة .. حتى لو لسه ما حصلتش ...

بعد ما سيبته، أخدت شقة لوحدي، في بيت واحدة صاحبتي
عشان أختي كانت بـ تتصل بطليقي يـيجي
فـسيبتها، وحلفت إني ما أخـشـش بيتها تاني

ممدوح، ممدوح، قوم
بـ يقولوا الشقة الـلـي قدامنا اتأجرت لبنتين.

أول مرة قولت لماما إني روحت القسم عملت محضر
قعدت تـصوت، لحد ما لمت البيت كله عليا
"جيبتي لنا العار والفضيحة"
"حطيتي رأس أبوكي في الطين بعد ما مات"
"إزاي تدخلي قسم؟"

موظف إدارة البعثات لما رفضت أدفع له رشوة، قال لي:
"أنتِ تروحي تعملي تحليل حمل عشان أمشي لك الإجراءات".