من وانا صغيرة، أمي كانت بـ تـتـعـمـد تسرح شعري وتـلمه جامد
عشان أسلم من تعليقات الناس عليه
فضلت كتير جدًا مش بـ نزل من البيت غير وشعري مفرود
وصل معايا الموضوع إني بـقـيـت بـ تكسف في المصيف
عشان مش هـ قدر أفرد شعري يوميًا بعد البحر

أنا ما كـنـتـش بكره شعري
بس كطفلة، كنت هادية جدًا، وبـ خاف من الناس
كنت بـ حاول أستخبى دايمًا من الناس والتعامل مع الناس
المهم الموضوع ده زاد جدًا بقى في المدرسة
بدأت التعليقات على شعري
"زي سلك المواعين" و"منكوشة"
وكل زمايلي كانوا بـ يـسـألـوني:"ليه شعرك كده؟"

"صوتك بناتى، وصوابعك شكلها بناتى"
"صدرك كبير شويه ليه؟ كُـل بيض كتير"
"شعرك ناعم زى البنات"

دايمًا بـ تعرض لتنمر على شكل جسمي؛ لأني نحيف جدًا،
طول الوقت هزار، وتريقة من صحابي،
لدرجة إني حاولت أتأقلم مع الموضوع، واعمل كأني مش بـ زعل، بس ما عرفتش.
ضيعت على نفسي لحظات كانت هـ تكون سعيدة كتير أوي بسبب الموضوع ده،
الجسم، التنمر

ظننت دومًا أنني مُتبناه أو ربما لست ابنتهم….
أنا الأولى بين أخوتي، وُلدت بشكل عادي، قمحية بشعرٍ مجعد (كيرلي)،
ولكن بنظرُه كنت سمراء، قبيحة، ذات شعر أكرت.
وازداد الأمر سوءًا عندما وُلدت أختي بعدي بثلاث سنوات،
وكانت ذات بشرة فاتحة، وشعر ناعم،

طول عمري جسمي مليان، وأهلي الحمد لله ما كانش عندهم مشكلة إني لازم أخس ولا حاجة.
بس وانا صغيرة، ماما كانت بـ تخاف تلبسني حاجات مفتوحة أوي؛ عشان ما أتحسدش،
وساعتها ما كـنـتـش حاسة بحاجة، ولا فاهمة إن جسمي مليان لحد ابتدائي تقريبًا،

أنا ولد، ومن صغري عندي موضوع التثدي "كبر حجم الثدي عند الرجال"،
كنت على طول بـ قنع نفسي إنه مش حاجة كبيرة، وكلها كام سنة ويروح،
وللأسف الموضوع ده دمرلي فترة مراهقتي،
ومش ناسي كل واحد وانا بـ كلمه، وهو بـ يبص على صدري.

أنا أمي طول عمرها نفسها في بنت بالجمال الأوروبي
ولما جيت وانا فعلًا جمال أوروبي خالص محدش كان بـ يعرف إني مصرية
بس للأسف شعري كيرلي،
إنهالت عليا التعليقات من جوا وبرا البيت

ماما مواقفها معايا كتير، عن السنان، والشعر، والجسم.
هـ بدأ بالسنان….
من وانا طفلة سناني فيها مشاكل، مش بـ عرف أهتم بيها،
ما كـنـتـش واخدة بالي من شكلي -طفلة في ابتدائي-،
بس تعليق ماما مش ناسياه:
"ابتسمي وبُقك مقفول؛ عشان تبقى حلوة".

اتولدت بنت مُشعرة، ورجلي كبيرة، وشكلها وحش.
طول عمري بـ سمع كلام من أهلي، إن يا عيني أنا مُشعرة،
كأن عندي مرض مثلاً، فاللي هو يا عيني عليها، هـ نعملها إيه؟