لما كانت بـ تـقـصـه كنت مش بـ عرف أربطه
فبـ يـكون شكله بشع تحت الحجاب في الـيـونـيـفـورم بتاع المدرسة
وكان كل الـلـي معايا في المدرسة بـ يـتـنـمروا عليا علشان شعري، ويقعدوا يلمسوه
لحد ما أمي قررت تخليني أعمله "بـيـرمـيـنـانـت" ودي مادة ريحتها بشعة وبـ تحرق.

أنا ولد، 17 سنة….
كان على طول تريقة عن إني رفيع، رفيع، دايمًا.
أنا ما كُـنـتـش رفيع رفع هزيل ومُلفت،
كنت وزني مثالي، لا ناقص كيلو، ولا زايد كيلو.
بس التريقة ما كانـتـش بـ تيجي من المجتمع الكبير،
للأسف كانت بـ تيجي من المجتمع الصغير، البيت؛

المشكلة إن أنا صوتي من وانا صغير طفولي،
وروحت لدكاترة كبيرة في مصر،
وقالوا لي دي طبيعة الصوت، مش أكتر أو أقل.
الجسم، التنمر، الذكورية

من ساعة ما جيت مصر بدأت أشوف تريقة الناس على شعري الكيرلي
بـ سمع التريقة في الشارع زي "سرحي شعرك"
"يا كرتة"
"إيه النكشة دي"

وزني زاد وانا بـ كبر،
وكنت طفلة كل ما طنط من قرايبنا تشوفني تقولي: "أنتِ تخنتي"،
وانا مراهقة ماما كانت بـ تنتقد وزني طول الوقت،
وتلبسني على مزاجها أكبر من سني،
ومحدش خد باله إني كنت منعزلة وحزينة.
الجسم، التنمر، العائلة

ماما مواقفها معايا كتير، عن السنان، والشعر، والجسم.
هـ بدأ بالسنان….
من وانا طفلة سناني فيها مشاكل، مش بـ عرف أهتم بيها،
ما كـنـتـش واخدة بالي من شكلي -طفلة في ابتدائي-،
بس تعليق ماما مش ناسياه:
"ابتسمي وبُقك مقفول؛ عشان تبقى حلوة".

وانا فى ثانية إعدادى كان فيه ولد معايا فى المدرسة فى أولى إعدادى أبيض وشعره أصفر
كان كل ما بيمشى فى المدرسة العيال كلها بتتحرش بيه،
وبيعملوا معاه الواجب.

أنا ولد، مش تخين، بس عندي صدر،
واحنا في مجتمع ريفي، بـ يتبص علي صدري قبل شكلي،
وبـ لاقي مضايقة من كل الناس، في الشارع، في الدروس، وفي المدرسة.
الجسم، التنمر، الذكورية

قعدت سنين طويلة أعمل شعري، واحط ميك اب،
لدرجة إني نسيت شكل شعري الطبيعي
كان بالنسبة لي يوم الأجازة إني أغسل شعري، وأسيبه بطبيعته
كنت بـ حس براحة مش طبيعية.

من وانا صغير كان عندي مشكلة في وشي….
وهي إن مناخيري كبيرة.
كلكم ضحكتم، صح؟ فعلًا لازم تضحكوا،
بس أنا الـلـي لازم اتعذب من جوا،
كلامكم عن شكلي بـ يقتلني، وانا صدقوني عمري ما هـ بين لكم إني زعلان،
بالعكس، يمكن أتريق معاكم على شكلي.