ياه، بقالي كتير محدش سألني السؤال ده،
جايز لأن الناس خلاص أصبحوا مقتنعين إن أي واحدة بـ تتحجب فهو لواحد من الأسباب التالية:
عمرو خالد، الأهل، الناس الـلـي في الشارع، علشان تـ تجوز.

السؤال في حد ذاته كان أحيانًا كتير بـ يستفزني،
لأني بصراحة شديدة اتسألته أول ما اتحجبت لحد ما طفحته،
في وقت كنت شايفة إن قراري بديهي، ومش محتاج مبرر.

لأ، ما سمعتش عمرو خالد، ولا أهلي كانوا بـ يدعوا لي بالتقوى والصلاح والإيمان،
ولا الناس الـلـي فى الشارع كانوا بـ يبصوا لي بصة وحشة علشان ماشية بشعري،
ولأ، ما اتحجبتش علشان اتجوز، لأن الـلـي من غير حجاب اتجوزوا أسرع.

هو ليه الناس كلها متصورة إن أي بنت بـ تتحجب بـ يكون نتيجة لاقتناع تام بفرضية الحجاب،
وعذاب ربنا لغير المحجبات؟ سمعت، فـ خافت، فـ اتحجبت.
وأنا بـ اقرا عن الحجاب، كنت مدركة تمامًا إن اقتناعي بيه كفرض ممكن يزول،
يعني أنا صغيرة، ممكن أكبر، وفكري يتغير، أو أقابل شخص يعمل لي غسيل مخ،
فلأ، ما اتـحـجـبـتـش علشان هو فرض.

وما اتـحـجـبـش ليه؟ "هـ شتغل إزاي؟"
هو أنا بـ حتاج شعري في الشغل في إيه؟
"والحاجات التانية الـلـي أنا غطيتها؟" ما هي دي أصلًا مش المفروض استعملها في الشغل.
"هــ عمل إيه في فرحي؟"، لأ حقيقي، هو أنتم بجد بـ تسألوا السؤال ده؟
"هـ عمل إيه لو في يوم صحيت عايزة أقلعه؟"، هـ قلعه.

أنا زهقت من مجتمع بـ يكوَن رأيه فيا بناءًا على لون شعري ومقاس صدري.
زهقت من السباق الـلـي بقينا إحنا كبنات منساقين فيه، علشان نثبت إن كل واحدة فينا أجمل وأحلى وأشيك،
محدش ينكر، لأنه موجود، حتى لو إحنا مش مدركينه.
أنا مش بـ قول إن الحجاب بـ يطلعني من السباق، ولكنه بـ يهد جزء كبير منه،
أو بـ يساعدني أهدي جزء كبير.

مش أنتم برضه قولتوا كل واحد حر في علاقته بربنا؟
ليه لما أعمل حاجة لربنا محتاجة أبررها لبني آدمين زيهم زيي؟
علشان مش شرط أكون عاملاه لربنا؟ والله دي حاجة برضه ترجع لي.
هو أنا عمري سألت واحدة بشعرها أنتِ ليه ما اتـحـجـبـتـيـش؟
عمري سألتك أنت ليه مش بـ تصلي؟

بعد فترة من حجابي، وزهقي من طرح السؤال، وخوض مناقشات حول فرضية ومش فرضية الحجاب،
ابتديت استخدم الأسباب الـلـي بعدها محدش هـ يدخل معايا في أي جدال.
"ليه اتحجبتي؟"، عندي مرض في شعري.
"ليه اتحجبتي؟"،أهلي أجبروني.
"ليه اتحجبتي؟"، ماي بوي فريند بقى، أعمل إيه؟ أصله متدين.
"اتحجبتي ليه؟"، أنا قرعة.

ولكن بعد مرور أكتر من 6 سنين، السؤال ده ما بقاش يستفزني،
بقى بـ يفرحني، بـ فرح إن فيه ناس مستعدة تسمعني، قبل ما تحكم عليا.
بقى بـ يفكرني أنا لابسة حتة القماشة دي ليه. علشان كل مرة أبص فى المرايا ألاقي بنطلون ضيق،
أو توب قصير، أفكر نفسي إني لو عايزة ألبس كده يبقى ممكن زي ما لبست الحجاب أقلعه.

سؤال بـ يفكرني إن أنا ما اتحجبتش علشان أبقى a funky Hijabi،
ولا علشان أقود مسيرة للدفاع عن حقوق المحجبات، ولا علشان أبقى أول محجبة تعمل مش عارف إيه فين،
"أمال اتحجبت ليه؟"
وأنت مالك؟
مش مهم اتحجبت ليه، ولا مهم ممكن أقلعه ولا لأ،
المهم مين دي الـلـي لابسة الحجاب، أصل أنا بني آدمة لابسة حجاب،
مش حجاب متفصل عليه بني آدمة على فكرة.