من وانا صغيرة كنت بـ تعرض للتنمر على جسمي….
على عكس الباقي، أنا كنت رفيعة جدًا، وما زلت رفيعة.
ما كـنــتش بـ شوف العود الفرنساوي الـلـي كله بـ يتكلم عنه أكتر ما بـ شوف التعليقات على جسمي بـ تؤذيني أنا،
وكان عامل كبير جدًا إن ثقتي في نفسي تتدمر.

أنا عندي 18 سنة، وداخلة أولى كلية السنة دي،
أنا صغيرة شوية، جسمي صغير، رفيعة، وقصيرة.
من ساعة ما دخلت ثانوي وكل ما حد يشوفني يقعد يقولي:
"أنتِ إزاي في ثانوي؟ أنتِ آخرك 3 ابتدائي"،

أنا عندي وحمة في وشي، تقريبًا نص وشي،
من ساعة ما وعيت على الدنيا وانا بـ قابل التعليقات والأسئلة السخيفة من نوعية:
"إلحق، دي محروقة".
"إيه الـلـي في وشك ده؟"
"هو أنتِ وشك محروق؟"
الجسم، التنمر، معايير الجمال

أنا مولودة عندي نسبة حَوَل في عيني، يقال إنها بسيطة،
بس للأسف عامة لي مشكلة، وأزمة نفسية،
لأن الناس كلها لما بـ تكلمني بـ تبص في عيني مباشرة.
ناس كتير سألتني: "هو أنتِ كنتي لابسة نضارة؟"
أنا في الحقيقة نظري ٦/٦ الحمد لله،

كنت حجمًا صغيرة من الطفولة للجامعة،
وكان ليا أخويا أكبر مني بسنة، الفرق كان صغير أوي،
بس قبل سن المراهقة، جسمه اتغير، وانا زي ما انا.
وعندي أخت أصغر مني بـ 8 سنين،
الإتنين أحجامهم حلوة، ومليانة، إلا أنا، كنت رفيعة.

من وانا صغيرة جسمي قليل في الوزن، ومش طويلة،
ودايمًا بـ سمع انتقادات من كل الـلـي حواليا، زي:
"أنتِ عاملة كده ليه؟ هو حد بـ ياكل أكلك؟"،
"ما تـتخني شوية يا بنتي، أنتِ كده هـ تعنسي، ومحدش هـ يبصلك".

اتولدت عندي مشكلة في طول أصابع القدم،
والنتيجة تنمر كتير عليا وانا صغيرة.
وانتهى بإني بقيت أتكسف ألبس حاجات مفتوحة تبين شكل صوابعي،

طول عمري وزني زايد، والعيلة بـ تعلق على جسمي طول الوقت.
كنت بـ حِس إني مباحة لأي حد يبص عليا وعلى جسمي، ويعلق،
"تخينة"، "بكابوظة"،
والقعدات العائلية حفلة عليا،
فـ كنت بـ كرهها أكتر من أي شيء….

من التعليقات الـلـي سمعتها:
"إيه المقشة دي؟"
"يا مجنونة"
"أم شعر يقرف"
"شعرها بلح"
"أنتِ حلوة، بس لو تسرحي شعرك"

أنا كنت بـ كوي شعري على طول
وكنت مرتبطة، وبعدها ما حـصـلـش نصيب بينا
وبعد ما سيبنا بعض،
قررت إني أربي شعري الطبيعي وابقى حرة بطبيعتي
رجعت لـلـي كنت مرتبطة بيه زمان، وكويته مرتين عشانه
في مرة بقول له إني جاية له بشعري الطبيعي
قال لي بالنص: "نعم! جاية بيه كده ليه؟"