أنا حورية بحر
أنا عارفة إني حورية بحر
بس كلهم بـ يقولوا لي: "انت مجرد سمكة بلطي"

في إعدادي
كنت بـحب ألبس شورت قصير وتي شيرت
وارقص قدام المرايا
كنت بـ ترن عُلق من ماما

أنا عايزة أبقى حرة
أكتب عن اللي أنا عايزاه
بس كل الستات اللي اتجوزوا بقى عندهم خطوط حمرا
أول ما تتجوز بـ يقول لها:
"بـ قول لك إيه احنا خلاص في بيت واحد
مفيش كل الكلام بقى ده اللي كنتِ بـ تكتبيه"

مرة عرفت إن جارتي الـلـي كانت بـ تلعب معانا على السلم هـ تتجوز،
كانت يمكن حوالي 16 سنة
قالت لي: "أنا عندي حاجة، وجوزي هـ ياخدها مني ويـ رميها بكره الصُبح. ماما قالت لي إن أنا مش هـ توجع".

أنا بـ حِس بالإحباط كتير أوي
لأني في مجتمع مش عاوز يحترمني إلا أما يـشوف معايا راجل
أي راجل، حتى لو ماشية معاه، ومش على علاقة شرعية بيه
المهم إنه يبقى قوي، عشان يقف للأوغاش في الشارع، أو حتى في المناسبات الاجتماعية.

من سنتين اكتشفت بالصدفة البحتة إن عندي أورام في الرحم …
الدكتور قال لي:
"الأورام مكانها خطر والعملية ممكن تخلينا نضطر لاستئصال الرحم"
خفت جدا لأن وجود الرحم بالنسبة لي أكبر من إنه يكون له علاقة بس بالجواز، هو مرتبط عندي بإحساس بالأنوثة إحساس بالأمومة .. حتى لو لسه ما حصلتش ...

أنا عندي دلوقتي 34 سنة
مُطلقة، بدون أولاد
لما جه سني 32 سنة،
لاقيت كل الدنيا بـ تضغط عليا إني لازم أتـنـيل أتجوز
وانا الصراحة ما كانش ليا فيه أوي
عشان كنت بـ خرج، وبـ تفسح، وعايشة حياتي
حسسوني إني هـ بقى عانس عمري كله.

أنا بـ شرب كل يوم حشيش
ولو ما عرفـتـش أجيب، بـ نهار
أنا نفسي أبطله
علشان كل مرة بـ سكور فيها، بـ يحصل لي موقف وحش.