عمري ما حلمت إني ألبس فستان أبيض وطرحة
بس عايشة وسط ناس بـ يطلبوا مني أقدم تقرير كل سنة
بـ قول فيه ليه ما لبستهوش

وبعد شهرين ونص كده، لاقيته بـ يقول لي: "لازم تقعدي في البيت
علشان أنا هـ بدأ انزل أشتغل، وأنتِ لازم تقعدي بالولد"
رفضت، وقلت له: "أوديه حضانة"

حبيبتي ما شاء الله كبرتي وبقيتي عروسة
عارفة أنا بـ ستنى اليوم ده من إمتى؟
من أول ما جبتك
من أول ما خلفتك وعرفت إني جبت بنت

كنت طالعة على السلم، ولابسة جاكيت أصفر قصير،
بـ لبسه على البيجامة لما بـ نزل أجيب لماما حاجات من تحت.
جه راجل طويل ورفيع، ولابس جاكيت بني، ووقفنى،
وحط إيده تحت.

"طيب هاتيلى ورقك وشغلك وتعالى وهـ ستناكى وهـ فضيلك نفسى"
وفى الآخر قالى:
"اوصفيلى نفسك يا بنتى شكلك إيه علشان مش فاكرك"
"أنا يا دكتور سمرا شوية وقصيرة وشعرى طويل"
"شعرك لونه إيه يا بنتى؟"
"لونه أسود يا دكتور، هو ده له علاقة بالجواب يا دكتور؟"

قالولي إنها لعبة.
إن كله بـ يلعبها وعايزين يشوفوا مين أشطر واحد.
كنت ساذجة أوى.
يوم ورا التانى بـ ندخل أوضة وكل واحد منهم يختار حد مننا ونروح و"نلعب".
يوم ورا التانى بـ نكتشف بعض فى اللعبة دي،
ويوم ورا يوم كنت بدخل الشقة متحمسة إننا نبدأ اللعبة.

أول مرة قولت لماما إني روحت القسم عملت محضر
قعدت تـصوت، لحد ما لمت البيت كله عليا
"جيبتي لنا العار والفضيحة"
"حطيتي رأس أبوكي في الطين بعد ما مات"
"إزاي تدخلي قسم؟"

أول مرة شفت شعرة بيضا فى المرايا، وقفت ربع ساعة بحاول أتاكد إنه حقيقى! دى شعرة بيضا فعلا؟! يالهوى! أنا عندى ٢٢ سنة