أول مرة جت لي كنت فاكرة إني اتعورت في المكان الحساس؛
عشان صدمة الدم، وإحساس الوجع كانوا حاجات جديدة عليا.
ما كُـنـتـش فاهمة إيه الـلـي بـ يحصل، ومحرجة جدًا من نفسي وجسمي والـلـي حصل له.
قررت اتعامل مع الموضوع لوحدي تمامًا، أنا كان عندي 11 سنة،

كنت بحب أنام بين أبويا وأمي، كنت بحب شوية أحضن أمي، وشوية اتقلب الناحية التانية أحضن أبويا.
وجه يوم أبويا ما جاش، فضلت سهران طول الليل مستنيه

هو أنا الموضوع عمره ما أثر معايا، حوارإني شولة،
وبـ آكل واشرب واكتب واطبخ وكل حياتي بإيدي الشمال
بس لحد دلوقتي 25 سنة، وأول مرة حد ياكل معايا يقول لي:
"إيه ده؟ أنتِ بـ تاكلي بالشمال؟ حرام يا بنتي"

أنا مش عايزة أبقى بنت بالطريقة الـلـي الناس بـ يشوفوا بيها البنت،
أنا مش عايزة أعمل shaving،
المشكلة الناس بـ يشوفوها عفانة،
بس أنا شايفة إنه عادي
حابة أكون فلات

الجسم، الضغوط الاجتماعية

أنا شعري كيرلي، وبحبه جدًا
تعبت من كلام الناس الغبي،
ونزولي الشارع من أوحش الحاجات الـلـي بـ تحصل لي
مغص فظيع كل ما آجي أنزل، مش عارفه ده social anxiety ولا إيه
أنا عندي ثقة في نفسي، وبحب شعري،
وكان نفسي الناس تتقبل الاختلاف

الشارع، الشعر

أنا وسيم جدًا الحمد لله،
لكن وأنا فى سن المراهقة كنت نحيف جدًا،
وده كان مخلي شكل ملامح وشي كبيرة، خصوصًا شفايفي،
وكان في ناس كتير بـ تقول لي: "شفاطيروا"،
منهم مدرسي فى المدرسة،
أنا عشت أزمة نفسية وعدم ثقة بسبب كده.

"اسمك إيه؟"
"فلان يا حاج"
"اسم أبوك؟"
"بـ تسأل ليه؟"
"أنت مش مسلم؟"

قصتي هي قصة مية واحد وواحدة، الاختلاف،
أو عشان التبرير يكون منطقي القصة هي الاختلاف
الاختلاف المرفوض الـلـي بـ تخاف منه وبـ تكرهه لأنه حرام، وأنت عارف